Ուրբաթ, 20 Նոյեմբերի 2026 10:38
Ալեքսանդր Ավանեսով

Կաջարան-Ագարակ ճանապարհահատվածի շինարարությունն ընթանում է ամբողջ թափով՝ Ճանապարհային դեպարտամենտ

Կաջարան-Ագարակ ճանապարհահատվածի շինարարությունն ընթանում է ամբողջ թափով՝ Ճանապարհային դեպարտամենտ

ԱրմԻնֆո.  «Հյուսիս-Հարավ» տրանսպորտային միջանցքի մաս կազմող Կաջարան-Ագարակ ճանապարհի 32 կիլոմետրանոց հատվածի շինարարությունն ընթանում է ամբողջ թափով։ Այս մասին ասվում է «Ճանապարհային դեպարտամենտ» հիմնադրամի հաղորդագրության մեջ։

Աղբյուրի համաձայն՝ այս ճանապարհն ունի ռազմավարական և տնտեսական նշանակություն։ Դրա շինարարությունը զգալիորեն կավելացնի բեռնափոխադրումների և ուղևորափոխադրումների ծավալը, երթևեկության արագությունն ու հարմարավետությունը, ինչն իր հերթին դրական շղթայական ազդեցություն կունենա տնտեսության մյուս ոլորտների վրա։

Կաջարան-Ագարակ ճանապարհի հատվածի շինարարությունը Հայաստանում իրականացվող եզակի նախագծերից մեկն է, որն իր մեջ միաժամանակ ներառում է գրեթե ողջ ճանապարհային ենթակառուցվածքը՝  կամուրջներ, թունելներ, էստակադներ, տրանսպորտային հանգույցներ և այլ արհեստական կառույցներ։  Աշխատանքների զգալի ծավալ է բաժին ընկնում նաև կապի գծերի տեղափոխմանն ու կառուցմանը։

Շինարարական աշխատանքների ընդհանուր ֆիզիկական առաջընթացը ներկայումս կազմում է շուրջ 60%։  Տեխնիկական տեսանկյունից առավել բարդ աշխատանքներն արդեն ունեն ավարտվածության բարձր տոկոս։  Օրինակ՝ թունելների հորատման աշխատանքներն ամբողջությամբ ավարտվել են, իսկ բարդ ռելիեֆային պայմաններում հողային աշխատանքների ավելի քան 90%-ն արդեն կատարված է

։

Այս փուլում առավել ակտիվ տեմպերով շարունակվում են կառույցների՝ կամուրջների, հենապատերի և թունելների ներքին երեսպատման ու հարդարման աշխատանքները։ Շինարարական աշխատանքներում միջին հաշվով ներգրավված է շուրջ 645 աշխատող և տարբեր շինարարական տեխնիկայի 228 միավոր։

Հիշեցնենք, որ Կաջարան-Ագարակ ճանապարհը կառուցվում է Հայաստանի կառավարության և Եվրասիական կայունացման և զարգացման հիմնադրամի համաֆինանսավորմամբ։ Նախագծի շրջանակում նախատեսվում է կառուցել 32 կմ ճանապարհ, երկու թունել և 17 կամուրջ, որոնցից ամենաերկարի երկարությունը կկազմի  720 մ։

 

Նախագծի կապալառուն իրանական ընկերությունների համատեղ ձեռնարկությունն է՝ Abad Rahan Pars International Group և Tunnel Sadd Ariana։ Շինարարական աշխատանքների տեխնիկական վերահսկողությունն իրականացնում է խորվաթական Institute IGH, Joint-Stock Company for Research and Development in Civil Engineering ընկերությունը։ Դեռևս 2023 թվականի ապրիլին հայտնի դարձավ, որ Եվրասիական կայունացման և զարգացման հիմնադրամը (ԵԿԶՀ) Հայաստանին կտրամադրի $200 մլն վարկ՝ «Հյուսիս-Հարավ» տրանսպորտային միջանցքի չորրորդ տրանշի շինարարության համար։ Տրանսպորտային երթուղին կունենա II տեխնիկական կարգ և կանցնի Մեղրիի շրջանցիկ ճանապարհով։ Այն  ներառում է 5 տրանսպորտային հանգույց, 2 թունել (դրանցից մեկի երկարությունը մոտ 450 մ է, որտեղ 2026 թվականի հոկտեմբերին ընթանում էին երեսպատման բետոնացման ավարտական աշխատանքները) և կամուրջներ։ Հատվածի շահագործման հանձնումը նախատեսվում է 2027 թվականին։