ԱրմԻնֆո: Հոկտեմբերի 1-ին ՀՀ էկոնոմիկայի նախարար Գևորգ Պապոյանը մասնակցել է Աշխաբադում կայացած Թուրքմենստանի ներդրումային ֆորումի (TIF 2026) «Ներդրումային գործունեությունը որպես դինամիկ և կայուն տնտեսական զարգացման հիմնական գործոն» խորագրով ռազմավարական լիագումար նիստին:
Ըստ էկոնոմիկայի նախարարության մամուլի ծառայության՝ իր ելույթում նախարարը ներկայացրել է Հայաստանի տնտեսական ոլորտում իրականացվող պետական քաղաքականության առաջնահերթությունները:
«Մենք աշխատում ենք լիցենզավորման ընթացակարգերի ժամկետները կրճատելու, նոր սերնդի արդյունաբերական գոտիներ զարգացնելու, բիզնես միջավայրը բարելավելու՝ Համաշխարհային բանկի B-READY վարկանիշին համապատասխան, և ՀՆԱ-ում արտասահմանյան ուղղակի ներդրումների մասնաբաժինը մեծացնելու ուղղությամբ»: «Մեր նպատակն է ներգրավել ներդրումներ, որոնք կարդիականացնեն ձեռնարկությունները, կբարձրացնեն արտադրողականությունը և կկապեն հայկական ընկերությունները միջազգային արժեքային շղթաների հետ», - նշեց Գևորգ Պապոյանը։
Իր ելույթում նախարարը նաև անդրադարձավ Հայաստանի ներդրումային քաղաքականության հիմնական ոլորտներին՝ արտադրողականության բարձրացում, տնտեսության վերափոխում և մարդկային կապիտալի զարգացում։
Գևորգ Պապոյանը նաև ընդգծեց ենթակառուցվածքների և տրանսպորտային հասանելիության կարևորությունը՝ մատնանշելով «Աշխարհի խաչմերուկ» նախաձեռնությունը և
դրա հիմնական բաղադրիչը TRIPP ենթակառուցվածքային նախագիծն է։
Ֆորումը միավորել է ավելի քան 800 պատվիրակների՝ կառավարական, ֆինանսական և միջազգային հաստատությունների ներկայացուցիչներ, ներդրողներ, նորարարներ և ոլորտի առաջատար փորձագետներ։
