Արմինֆո. Հայաստանում բենզինի գինը հասել է պատմական առավելագույնի՝ 600 դրամի, կամ մոտ 1.65 դոլարի՝ մեկ լիտրի դիմաց։ Այդ մասին «Ֆեյսբուքի» իր էջում գրել է "Ապրելու երկիր" կուսակցության համահիմնադիր Մեսրոպ Առաքելյանը:
«Ու այդ թանկ բենզինի մի զգալի մասը մենք ծախսում ենք ոչ թե ճանապարհ անցնելու, այլ Երևանի խցանումների մեջ կանգնելու վրա։ Այսպիսով, իշխանության անգործության գինն ամեն օր վճարում են հարյուր հազարավոր վարորդներ՝ իրենց ժամանակի, առողջության և գրպանի հաշվին», - նշել է քաղաքական գործիչը:
Նշենք, որ խոշոր բենզալցակայաններում, ինչպիսիք են Flash, Maxoil, CPS, Gulf, ԱԻ- 95 եւ պրեմիում ապրանքանիշների բենզինի գինը հասել է 580-620 դրամի՝ մեկ լիտրի դիմաց։ Գների կտրուկ աճի պատճառով Հայաստանի Մրցակցության պաշտպանության հանձնաժողովը կապ է հաստատել խոշոր գործարարների և ներմուծողների հետ՝ ստուգելու թանկացման հիմնավորվածությունը: Վառելիքի արժեքի աճը կապված է արտաքին գործոնների, համաշխարհային գների տատանումների եւ լոգիստիկայի հետ, ինչի վրա ուշադրություն է հրավիրել նաեւ Հայաստանի Կենտրոնական բանկի նախագահ Մարտին Գալստյանը:
