Արմինֆո. Պաշտոնական Թեհրանը կոչ է արել վերացնել իրանա-հայաստանյան սահմանի Նորդուզի սահմանային անցակետով ապրանքների և մարդկանց տարանցման բոլոր խոչընդոտները: Այս կոչը, ինչպես հաղորդում է իրանական IRNA լրատվական գործակալությունը, արել է Ազատ և հատուկ տնտեսական գոտիների Գերագույն խորհրդի քարտուղար Հոսեյն Ֆորուզանը:
Նա նշել է, որ Նորդուզի սահմանային անցակետում առկա խնդիրներն ու մարտահրավերները լուծելու համար անհրաժեշտ է մշտական մոնիթորինգ և ճշգրիտ համակարգում Նորդուզի սահմանային անցակետի համար պատասխանատու բոլոր գերատեսչությունների միջև: Հոսեյն Ֆորուզանը հավելել է, որ այս սահմանային անցակետում առևտրի և տարանցման գործընթացները հեշտացնելու համար գործադիր և վերահսկիչ մարմինները պետք է խուսափեն անհամաձայնեցված որոշումներ կայացնելուց: Նա նշել է, որ մեքենաների պարապուրդի կրճատումը և մաքսային ծառայությունների բարելավումը անմիջականորեն կապված են արտահանման զարգացման հետ, և դրան խոչընդոտող գործոնները պետք է արագ լուծվեն։
«Նորդուզում ֆիզիկական ենթակառուցվածքների զարգացումը և մաքսային ընթացակարգերի պարզեցումը անհրաժեշտ են գոտու տարանցիկ հզորությունների արդյունավետ օգտագործման համար», - նշել է Ազատ և հատուկ տնտեսական գոտիների Գերագույն խորհրդի քարտուղարը։
Նշենք, որ Նորդուզի սահմանային անցակետը, որը գտնվում է Արաքս գետի մոտ, Իրանի և Հայաստանի միջև միակ ցամաքային սահմանն է և ռազմավարական դեր է խաղում երկրի առևտրային հարաբերություններում Եվրասիական տնտեսական միության անդամների հետ։
