Արմինֆո. ՀՀ կառավարությունը 67.456 միլիոն դրամ կհատկացնի ՀՀ Արդարադատության նախարարության Պրոբացիայի ծառայության նկուղի վերանորոգման համար: Որոշումն ընդունվել է օգոստոսի 27-ի կառավարության նիստում:
Որոշման նախագծի հիմնավորման մեջ նշվում է, որ մոտ 530 քառակուսի մետր մակերեսով նկուղը ներկայումս չի օգտագործվում ջրամատակարարման, ջրահեռացման և կոյուղու համակարգերի խիստ վատթարացման պատճառով: Վերոնշյալ համակարգերի հաճախակի խափանումների, ինչպես նաև դրսից անձրևաջրերի ներթափանցման և ազդեցության հետևանքով շենքի հիմքը աստիճանաբար վատանում և թուլանում է՝ մեծացնելով սեյսմիկ անվտանգության որոշակի ռիսկեր: Ժամանակի ընթացքում մաշված ջրամատակարարման և կոյուղու խողովակներից ջրի արտահոսքը, ջերմաստիճանի բարձրացման հետ մեկտեղ, շենքի ներսում տարածում է անտանելի, սուր հոտ՝ ստեղծելով ոչ սանիտարական միջավայր:
Այս խնդիրը լուծելու համար, հաշվի առնելով առկա և չօգտագործվող նկուղի տարածքը, կատարվել են համապատասխան հաշվարկներ և կազմվել է վերակառուցման նախահաշիվ: Այս գնահատականի համաձայն, եթե նախատեսված աշխատանքները կատարվեն, հնարավոր կլինի նկուղում ստեղծել 125 քառակուսի մետր աշխատանքային տարածք (մեկ դասարան, չորս գրասենյակ), ինչպես նաև 110 քառակուսի մետր օժանդակ տարածք՝ պահեստ, զուգարաններ, հանդերձարաններ և այլ տեխնիկական սենյակներ: Եթե վերոնշյալ աշխատանքները կատարվեն, հնարավոր կլինի ազատել Ծառայության շենքի մյուս հարկերում գտնվող օժանդակ և այլ տարածքները և տեղափոխել դրանք նկուղ: Սա կստեղծի մոտ 235 քառակուսի մետր լրացուցիչ օգտագործելի տարածք:
