Արմինֆո. Հայաստանի իշխող ուժի մաթեմատիկական գիտելիքները սահմանափակվում են 5-րդ դասարանով, քանի որ նրանք կարծում են, թե զուտ մաթեմատիկորեն Հայաստանում իրատեսական չէ 5 տարում 300 հազար նոր աշխատատեղի ստեղծումը։ Այս մասին այսօր մամուլի ասուլիսի ժամանակ հայտարարել է խոշորագույն ընդդիմադիր «Ուժեղ Հայաստան» կուսակցության ղեկավար, հայտնի գործարար և բարերար Սամվել Կարապետյանը։
«Մինչև 300 հազար աշխատատեղի ստեղծումը հնարավոր է, պարզապես պետք է ցանկություն ունենալ և հենվել մեր ունեցած հնարավորությունների վրա, այդ թվում՝ անձնական հարթության մեջ։ Մենք հենվելու ենք նաև մեր գործընկերների, մեր սփյուռքի վրա, և վերականգնելով վստահությունը Հայաստանի հանդեպ՝ լրջորեն կխթանենք ներդրումային հոսքերը», - ասել է նա։
«Մենք առաջնահերթ զբաղվելու ենք մարզերով. չի լինելու միայն առաջին քայլ, լինելու են մի շարք քայլեր՝ ամեն օր, ամեն ժամ, որպեսզի ապահովենք մեր ժողովրդի բարեկեցությունը, և վստահ եղեք՝ մենք դա կանենք», - նշել է նա։
Նրա խոսքով՝ պետությունը կանգնած է լինելու բիզնեսի կողքին։ Այսօր բիզնեսը պետության թշնամին է։ Հայաստանում բազմաթիվ գործարարների նկատմամբ հարյուրավոր քրեական գործեր են հարուցված։ Այդ մարդկանց ընտանիքները գտնվում են քրեական հետապնդման մեջ, նրանց ծնողները և նույնիսկ չափահաս երեխաները մշտական ճնշման են ենթարկվում քննչական մարմինների կողմից, ենթարկվում են բռնության։ «Ո՞ր գործարարը ցանկություն կունենա ներդրումներ անել նման երկրում», - հարցրել է Forbes-ի ցուցակի գործարարը։
Նա նշել է, որ իր քաղաքական ուժը Հայաստանը կդարձնի 10 միլիոն հայերի հայրենիքը, մինչդեռ Փաշինյանը ցանկանում է երկիրը վերածել մի վայրի, որի բնակչությունը բաղկացած կլինի 3 միլիոն հայից և 300 հազար ադրբեջանցուց։
«Մենք չենք խոստանում, հենց առաջին օրերից մենք խուսափում ենք դատարկ խոստումներից։ Մենք երաշխավորում ենք։ Մենք լավ ենք պատկերացնում մեր հնարավորությունները», - ընդգծել է Կարապետյանը։
