Արմինֆո. Ադրբեջանը հետաքրքրված է Հայաստանից ալյումինի փայլաթիթեղի մատակարարմամբ։ Այս մասին հայտարարել է ՀՀ էկոնոմիկայի նախարար Գևորգ Պապոյանը՝ "Քաղաքացիական պայմանագիր" կուսակցության 8-րդ համագումարի հարթակներում ճեպազրույցի ժամանակ։
«Ադրբեջանական կողմից ալյումինի փայլաթիթեղի վերաբերյալ կոնկրետ հարցում է ստացվել։ Խոսքը որոշակի կոդով արտադրանքի մասին էր. հարցում է արվել գնի մասին, ինչպես նաև՝ մատակարարումների հնարավոր ծավալների և ժամկետների մասին։ Հայ արտադրողը տրամադրել է բոլոր անհրաժեշտ տվյալները», - պատմել է նա։
Նախարարի խոսքով՝ փոխադարձ առևտրի համար պոտենցիալ ապրանքների ցուցակների փոխանակումից հետո ամենաերկար բանակցություններն ընթացել են հենց ալյումինի փայլաթիթեղի շուրջ։ "Ադրբեջանական կողմից առայժմ պատասխան չի հետեւել", - ասել է Պապոյանը։
Նշենք, որ ըստ Վիճակագրական կոմիտեի տվյալների, 2025 թվականին ալյումինի փայլաթիթեղի արտադրությունը 23,2 տոկոս անկումից հասել է 4,6 տոկոս աճի՝ ապահովելով 20,6 հազար տոննա ծավալ։
Հայաստանից ալյումինի փայլաթիթեղի արտահանման տարեկան անկումը 2025թ.առաջին կիսամյակում դանդաղել է՝ 22,8%-ից մինչեւ 8,7%՝ կազմելով 9,2 հազար տոննա։ Ընդ որում, արտահանված փայլաթիթեղի մաքսային արժեքը տարեկան կտրվածքով աճել է 29,3%-ով (մեկ տարի առաջվա 36% անկման դիմաց)՝ կազմելով 40,8 մլն դոլար: Փայլաթիթեղն արտահանվել է, հիմնականում, Գերմանիա (64,5%), ավելի քիչ ՝ Նիդերլանդներ (18%), Լեհաստան (10%), Ռուսաստան (4,1%) և Ֆրանսիա (1,7%), իսկ մնացած ծավալը բաժին է ընկել Չեխիային, Իտալիային, Վրաստանին, Բելառուսին և ԱՄԷ-ին:
Հայաստանում ալյումինի փայլաթիթեղի միակ արտադրողը Երևանի "Արմենալ" փայլաթիթեղագլանման գործարանն է (մտնում է ալյումինի աշխարհի խոշորագույն արտադրողներից մեկի ՝ ռուսական "Ռուսալ" ընկերության կառուցվածքի մեջ): "Ռուսալ" ընկերությունն այժմ ծանր "ենթապատժամիջոցային" ժամանակաշրջան է ապրում, որն անդրադառնում է նաեւ հայկական "դստեր" վիճակի վրա։
