Հինգշաբթի, 19 Նոյեմբերի 2026 14:53
Ալինա Հովհաննիսյան

Հարցը մեկն է․ արդյո՞ք ՌԵՈՒ-ը  պատրաստ է ներդրումներ կատարել Հայկական երկաթուղու մրցունակության անհրաժեշտ մակարդակի հասնելու համար. վարչապետ

Հարցը մեկն է․ արդյո՞ք ՌԵՈՒ-ը  պատրաստ է ներդրումներ կատարել Հայկական երկաթուղու մրցունակության անհրաժեշտ մակարդակի հասնելու համար. վարչապետ

Արմինֆո.  Ենթադրում եմ, որ Հայկական երկաթուղու կոնցեսիոն կառավարումը երրորդ կողմին հանձնելու հարցը կքննարկվի ՌԴ նախագահի հետ հանդիպման ժամանակ։ Այդ մասին նոյեմբերի 19-ին ճեպազրույցում ասել է Հայաստանի վարչապետ Նիկոլ Փաշինյանը։ Նա նշել է, որ, իրականում, հարցը, որի պատասխանն այժմ անհրաժեշտ է ստանալ, այն է, թե արդյոք "Ռուսական երկաթուղիները" պատրաստ է խոշոր ներդրումներ կատարել Հայկական երկաթուղու արդիականացման գործում:

 

"Երբ ՌԵՈՒ-ի տնօրեն Օլեգ Բելոզյորովը աշխատանքային խմբի հետ եկել էր, ես ասել եմ, որ մեզ պետք են կոնկրետ հարցերի պատասխաններ, եւ աշխատանքային խումբը, ի դեպ, ձեւավորվել է այդ հարցերի պատասխանը տալու համար: Իրականում հարցը մեկն է. արդյո՞ք "Ռուսական երկաթուղիները" պատրաստ է անհրաժեշտ ծավալի ներդրումներ կատարել Հայաստանի երկաթուղին մրցունակության անհրաժեշտ մակարդակի հասցնելու համար: Եթե պատրաստ եք՝ շատ լավ։ Եթե պատրաստ չենք, ուրեմն պետք է այլ ներդրողներ գտնենք։ Սա է հարցը", - պարզաբանել է կառավարության ղեկավարը։

 

Հիշեցնենք, որ Նիկոլ Փաշինյանն այս տարվա փետրվարի 13-ին առաջին անգամ հնչեցրել էր Ռուսաստանի կողմից երկաթուղիների կոնցեսիայի վաճառքի առաջարկ։ Նա հայտարարել էր, որ ռուսական կողմից Հայաստանի երկաթուղիների կոնցեսիոն կառավարման փաստը Հայաստանի համար մրցակցային խնդիրներ է ստեղծում, եւ շատ միջազգային գործընկերներ ցանկանում են շրջանցել Հայաստանի տարածքը՝ ենթակառուցվածքային նախագծեր իրականացնելիս: Այդ առումով նա առաջարկել էր ՌԴ - ին մտածել երրորդ, բարեկամ երկրին կոնցեսիան վաճառելու մասին։ Որպես օրինակ նա առաջարկել էր Ղազախստանը, ԱՄԷ - ն կամ Կատարը։ Ռուսաստանում անհիմն էին համարել Փաշինյանի այդ պնդումները և հայտարարել, որ մտադիր չեն վաճառել հայկական երկաթուղիների կոնցեսիան։

 

Հիշեցնենք, որ " ՀԿԵ " ՓԲԸ-ն "Ռուսական երկաթուղիներ"ԲԲԸ-ի 100% դուստր ընկերությունն է: 2008 թվականի փետրվարի 13-ին Երևանում "Ռուսական երկաթուղիներ" ԲԲԸ-ի և Հայաստանի Հանրապետության միջև ստորագրվել է կոնցեսիոն պայմանագիր հանրապետության երկաթուղային տրանսպորտի համակարգը "ՀԿԵ" ՓԲԸ կառավարմանը հանձնելու մասին: Պայմանագրի համաձայն, կոնցեսիոն կառավարման ժամկետը 30 տարի է ՝ կողմերի փոխադարձ համաձայնությամբ աշխատանքի առաջին քսան տարուց հետո ևս 10 տարով երկարաձգելու իրավունքով ։ "ՀԿԵ" ՓԲԸ խնդիրների մեջ են մտնում ՀՀ երկաթուղու ենթակառուցվածքի արդիականացումը, Հայաստանին սահմանակից պետությունների հետ համագործակցության զարգացումը, ներհանրապետական և միջազգային ուղևորափոխադրումների և բեռնափոխադրումների զարգացումը: Ընկերության կողմից իրականացվող ներդրումների չափը կազմում է 572 մլն դոլար: "ՀԿԵ" ՓԲԸ իր գործունեությունը սկսել է 2008թ. հունիսի 1-ից։