
ԱրմԻնֆո։ ՀՀ տարածքային կառավարման և ենթակառուցվածքների նախարարությունը մտադիր է Եվրոպական ներդրումային բանկի հետ համաձայնագիր կնքել EPIC նախաձեռնության (Facility for Eastern Partnership Investment in Connectivity - «Ներդրումներ Արևելյան գործընկերության կապակցվածության ոլորտում») շրջանակում, որը կուղղվի Հայաստանի ռազմավարական տրանսպորտային ենթակառուցվածքների նախապատրաստմանը և զարգացմանը։ ՀՀ կառավարությունը նոյեմբերի 19-ի նիստում հավանություն է տվել ԵՆԲ-ի հետ համապատասխան համաձայնագրի կնքմանը։
Ելույթ ունենալով՝ ՏԿԵ նախարար Դավիթ Խուդաթյանը նշել է, որ խոսքը վերաբերում է Բանկի կողմից ՀՀ կառավարության «Խաղաղության խաչմերուկ» նախաձեռնության և ԵՄ կապակցվածության օրակարգի (EU Connectivity Agenda / Global Gateway) իրականացմանն ուղղված խորհրդատվական ծառայությունների մատուցմանը։ Մասնավորապես, նախատեսվում է Ախուրիկ համայնքից Գյումրիի ուղղությամբ կառուցել 25 կմ երկարությամբ ճանապարհ, իսկ Արմավիրի մարզում՝ Վարդանաշեն գյուղից «Մարգարա» անցակետի ուղղությամբ՝ 5 կմ երկարությամբ ճանապարհ։ ԵՆԲ-ն կաջակցի նախագծերի մշակմանը, կապալառուի ընտրության մրցութային փաստաթղթերի նախապատրաստմանը, ինչպես նաև Թուրքիայի սահման տանող ճանապարհների հիմնանորոգման սոցիալական և բնապահպանական ազդեցությունների գնահատմանը։ Դրանց հիմնանորոգման նախագծերը կկազմվեն 1,5 տարվա ընթացքում։ Ընդհանուր առմամբ խոսքը 30 կմ երկարությամբ ճանապարհների մասին է։ Ներկայումս եզրափակիչ փուլում է «Մարգարա» անցակետի սահմանամերձ կամրջի հիմնանորոգման ծրագրի տեխնիկատնտեսական հիմնավորման մշակումը։
Իր հերթին Հայաստանի Պետական եկամուտների կոմիտեի նախագահ Էդուարդ Հակոբյանը հայտարարել է, որ Վերակառուցման և զարգացման եվրոպական բանկի հետ վարկային համաձայնագրի շրջանակում ավարտին է մոտենում հայկական «Մարգարա» անցակետի մոտ Արաքս գետի վրայով անցնող կամրջի նախագծումը։ Նախապատրաստվում է նաև «Ախուրիկ» անցակետի նախագիծը։ Մաքսային զննության ենթակառուցվածքների և սարքավորումների համար ՎԶԵԲ-ի վարկը կազմում է 19,6 մլն եվրո։