Արմինֆո.Այժմ Հայաստանի անշարժ գույքի շուկան վերածնունդ է ապրում և գտնվում է վերելքում, որը սկսվել է 2019 թվականից։ Նման կարծիք է հայտնել Ամերիաբանկի My Home հարթակի ղեկավար Հայկ Գալստյանը՝ TOON EXPO 2026 մասնագիտացված ցուցահանդեսի հարթակներում պատասխանելով ԱրմԻնֆո-ի թղթակցի հարցին։
Նա իրավիճակը կապել է Երևանում և հարակից շրջաններում եկամտահարկի վերադարձի մեխանիզմի փուլային վերացման հետ։ Գալստյանի ասելով՝ անշարժ գույքի առքուվաճառքի գործարքներն արդեն հասել են իրենց գագաթնակետին։ "Մարդիկ փորձում են ցատկել վերջին գնացքի վերջին վագոնի մեջ, և այժմ պահանջարկը, պարզապես, խելահեղ է, անբնական՝ ես կասեի։ Եվ մենք կանխատեսում ենք, որ հաջորդ տարվա սկզբից այն հավասարաչափ բաշխվելու է ըստ ամիսների։ Այժմ պիկ արժեք է, քանի որ մեխանիզմի գործողության ավարտին մնացել է ընդամենը մեկուկես ամիս", - ասել է փորձագետը։
Սակայն, Գալստյանի կանխատեսումների համաձայն, երկու տարի հետո Հայաստանի անշարժ գույքի շուկան կհասնի որոշակի բարձրահարթի և կկայունանա։
Հիշեցնենք, որ 2025 թվականից Երևանում դադարել է գործել հիփոթեքային վարկեր վերցնողներին եկամտահարկի վերադարձման պետական ծրագիրը, սակայն մարզերում այն շարունակվում է: Հայաստանի իշխանությունները ցանկանում են 2029 թվականից ամբողջությամբ վերացնել հիփոթեքային վարկեր վերցնողներին եկամտահարկի վերադարձը։ Չեղարկումը կլինի աստիճանական։ Այսպես, 2027թ. հունվարի 1 - ից հետո առաջնային շուկայում հիփոթեքային վարկերի գծով եկամտահարկը չի վերադարձվում, եթե գույքը գտնվում է Երևան քաղաքին հարող մարզերում՝ Արագածոտնում, Արարատում, Արմավիրում և Կոտայքում ։ 2029թ.հունվարի 1-ից հիփոթեքային վարկերի գծով եկամտահարկի վերադարձը կդադարի գործել նաև մյուս մարզերում։ Սահմանափակումները չեն վերաբերի սահմանամերձ բնակավայրերին։
Հիշեցնենք, որ առաջնային շուկայում բնակարանների (բնակարաններ նորակառույցներում կամ նոր առանձնատներ) ձեռք բերման հիփոթեքային վարկերի գծով եկամտահարկի վերադարձման պետական ծրագիրը Հայաստանում գործում է 2014 թվականի նոյեմբերից: Ընդհանուր առմամբ, 2015-2024թթ. պետական բյուջեից այդ ծրագրից օգտված քաղաքացիներին վերադարձվել է 209.7 մլրդ դրամ (529 մլն դոլար)։ 2025 թվականին դրա համար պահանջվել է 96.67 մլրդ դրամ կամ 253 մլն դոլար (ի սկզբանե նախատեսված 84.070 մլրդ դրամը գումարած լրացուցիչ հատկացված 12.6 մլրդ դրամ)։
