Արմինֆո.Նոյեմբերի 10-ին Եվրասիական տնտեսական հանձնաժողովի կոլեգիայի նիստի արդյունքում հավանության է արժանացել հեռանկարային շուկաների և արդյունաբերության ճյուղերի մասին զեկույցը՝ Եվրասիական տնտեսական միության պետությունների համատեղ արտահանման համար։ Այդ մասին հաղորդել է ԵՏՀ մամուլի ծառայությունը։
Աղբյուրի համաձայն, 2025 թվականին ԵԱՏՄ արդյունաբերական հատվածի զարգացումն ուղեկցվել է արտադրության ծավալների աճով, համագործակցության խորացմամբ և համատեղ նախագծերի իրականացմամբ։ Վերամշակող արդյունաբերության արտադրանքի արտահանումը երրորդ երկրներ աճել է 9,9 %-ով՝ մինչեւ 103,7 մլրդ դոլար։ Ինչպես ցույց է տվել վերլուծությունը, Միության շրջանակներում առավել կոոպերացիոն և արտահանման ներուժ ունեն մետաղագործությունը, քիմիական արդյունաբերությունը, մեքենաշինությունը, միկրոէլեկտրոնիկան և դեղագործությունը, իսկ արդյունաբերական համագործակցության և արտահանման զարգացման համար առանցքային շուկաներ են Չինաստանը, Հնդկաստանը, Ուզբեկստանը, ԱՄԷ-ն, Եգիպտոսը, Իրանը, Բրազիլիան և Աֆրիկայի երկրները: ԵՏՀ արդյունաբերության և ագրոարդյունաբերական համալիրի հարցերով նախարար Գոհար Բարսեղյանը նշել է, որ բացահայտված կոոպերացիոն և արտահանման ներուժի իրացումը պահանջում է անցում համակարգային աշխատանքի: "Արտաքին շուկաներում համատեղ ներկայությունն ավելացնելու և ԵԱՏՄ երկրների արտադրողների մրցունակությունը բարձրացնելու համար անհրաժեշտ է գործարկել արդյունաբերական համագործակցությանը ֆինանսական աջակցության մեխանիզմ, ավելի ակտիվ ներգրավել փոքր և միջին բիզնեսը խոշոր ձեռնարկությունների արտադրական շղթաներում, լիարժեք օգտագործել ազատ առևտրի մասին գործող համաձայնագրերի հնարավորությունները", - առաջարկել է Գոհար Բարսեղյանը:
Զեկույցի գործնական եզրակացություններն ու հանձնարարականները կարող են օգտագործվել ԵԱՏՄ պետությունների կողմից արտադրական կոոպերացիայի զարգացման հեռանկարային ուղղությունները որոշելիս և երրորդ երկրների շուկաներ արտահանումն ավելացնելիս:
