ԱրմԻնֆո. ՀՀ բարձր տեխնոլոգիական արդյունաբերության և արհեստական բանականության նախարար Դավիթ Թադևոսյանն ընդունել է Philip Morris International-ի գիտության և տեխնոլոգիաների գծով փոխնախագահ Լուկա Ռոսսիի և PMI գիտական հետազոտությունների կենտրոնի տնօրեն Գուրգեն Մարդոյանի գլխավորած պատվիրակությանը։
Հանդիպման ընթացքում կողմերը քննարկել են Հայաստանի բարձր տեխնոլոգիական և հետազոտական ներուժի զարգացումը, կիսահաղորդչային արդյունաբերության և միկրոէլեկտրոնիկայի ոլորտներում կարողությունների ընդլայնումը, ռադիոհաճախականությունների և էլեկտրական էլեկտրոնիկայի ոլորտում հետազոտությունների առաջխաղացումը, ինչպես նաև կենսատեխնոլոգիայի ոլորտում առկա հնարավորությունները։
Քննարկվել են նաև Երևանից դուրս տեխնոլոգիական կլաստերների և արդյունաբերական գոտիների ձևավորման հեռանկարները, այդ թվում՝ «Ակադեմիական քաղաքի» ստեղծումը։ Որպես գիտության, կրթության զարգացման, հետազոտությունների առևտրայնացման և արդյունաբերական զարգացման միջավայր։
Նախարար Թադևոսյանը ներկայացրեց Հայաստանի բարձր տեխնոլոգիական ոլորտի զարգացման առաջնահերթությունները՝ ընդգծելով, որ հաջորդ հինգ տարիների պետական քաղաքականությունը ուղղված է ոչ միայն ծրագրային ապահովման և արհեստական բանականության զարգացմանը, այլև նոր ոլորտներում, այդ թվում՝ կենսատեխնոլոգիայի, կիսահաղորդչային արտադրության և միկրոէլեկտրոնիկայի, կարողությունների զարգացմանը և ընդլայնմանը։
Նա նաև ընդգծեց հետազոտական և հաշվողական ենթակառուցվածքների զարգացման կարևորությունը՝ նշելով, որ պետությունը նախատեսում է մոտ 25 միլիոն դոլար հատկացնել հաշվողական ռեսուրսների և գրաֆիկական պրոցեսորների սարքավորումների ձեռքբերման համար։ Այս ռեսուրսների մի մասը հասանելի կլինի հետազոտական խմբերի և ընկերությունների համար՝ նպաստելով հետազոտությունների ընդլայնմանը և նոր մշակումների իրականացմանը։
Իր հերթին, Լուկա Ռոսսին ներկայացրեց Ֆիլիպ Մորիսի հետազոտական և զարգացման գործունեությունը Հայաստանում, որը ներառում է այնպիսի ոլորտներ, ինչպիսիք են արհեստական բանականությունը, տվյալների վերլուծությունը, մեքենայական ուսուցումը, մաթեմատիկան, վիճակագրությունը և փորձարարական ճարտարագիտությունը։ Նա նաև խոսեց ընկերության Ինժեներական քաղաքում ընդլայնման մասին՝ ընդգծելով Հայաստանի ճարտարագիտական և գիտական ներուժի, ինչպես նաև տեղական մասնագիտական համայնքի հետ համագործակցության կարևորությունը։
Կողմերը շեշտեցին պետական-մասնավոր հատվածի համագործակցության զարգացման և միջազգային ընկերությունների հետազոտական և զարգացման գործունեության ու Հայաստանի գիտական և ճարտարագիտական համայնքի միջև կապերի ամրապնդման կարևորությունը։ Պայմանավորվածություն ձեռք բերվեց շարունակել քննարկումները՝ համագործակցության հնարավոր ոլորտները զարգացնելու համար։
