ԱրմԻնֆո. Հայաստանի փոխարտգործնախարար Վահան Կոստանյանը հանդիպել է Չեխիայի արտաքին գործերի նախարարի տեղակալ Յիրժի Բրոդսկիի հետ:
Քննարկումների ընթացքում կողմերը նախանշել են համագործակցության հեռանկարային ուղղությունները, որոնց թվում են բարձր տեխնոլոգիաները, արհեստական բանականությունը, ջրային ռեսուրսների կառավարումը, երկկողմ առևտուրն ու զբոսաշրջությունը: Նրանք պայմանավորվել են շարունակել երկխոսությունն այդ ուղղություններով ՝ միջկառավարական հանձնաժողովների ձևաչափով։
Զրուցակիցները մտքեր են փոխանակել նաև Հայաստան-ԵՄ գործընկերության ռազմավարական օրակարգի առաջմղման, Հարավային Կովկասում իրավիճակի զարգացումների, ինչպես նաև միջազգային օրակարգի փոխադարձ հետաքրքրություն ներկայացնող մի շարք հարցերի շուրջ:
Երկու երկրների միջև բարեկամական հարաբերությունների դինամիկ զարգացման համատեքստում Կոստանյանը և Բրոդսկին կարևորել են բարձր մակարդակի փոխայցելությունները:
Նշենք, որ ըստ ՀՀ վիճակագրական կոմիտեի տվյալների, Հայաստանի և Չեխիայի միջև առևտրի փոխադարձ ծավալը 2026 թվականի առաջին կիսամյակում աճել է 22,6% - ով՝ կազմելով 28,6 մլն դոլար: Ընդ որում, արտահանումն աճել է 49% - ով՝ մինչև 3,2 մլն դոլար՝ ներմուծման 19,9% աճի ֆոնին՝ մինչև 25,4 մլն դոլար։
