Արմինֆո. Հայաստանի համար Ռուսական երկաթուղիների (ՌԵՈՒ), իբր, "թունավորության" մասին Հայաստանի վարչապետ Նիկոլ Փաշինյանի հայտարարություններն իրականության հետ կապ չունեն։ Այդ մասին սեպտեմբերի 2-ին հայտարարել է ՌԴ փոխվարչապետ Ալեքսեյ Օվերչուկը՝ Արեւելյան տնտեսական ֆորումի հարթակներում։
Նրա խոսքով, ինչպես հաղորդում է "Իզվեստիա"-ն, ՌԵՈՒ-ն շարունակում է իրականացնել միջազգային փոխադրումներ, այդ թվում ՝ տարանցիկ մատակարարումներ Ռուսաստանի տարածքով դեպի Եվրոպա, ընդ որում, ընկերության նկատմամբ պատժամիջոցային սահմանափակումների վերաբերյալ հարցեր չեն առաջանում:
"Ոչ ոք Ռուսական երկաթուղիների նկատմամբ որևէ թունավորության կամ պատժամիջոցի մասին հարցեր չի բարձրացնում՝ բացի Փաշինյանից", - ասել է Ռուսաստանի փոխվարչապետը։
Նա նաև հաղորդել է, որ Հայաստանը Ռուսաստանին պաշտոնական հարցմամբ չի դիմել Հարավկովկասյան երկաթուղու կոնցեսիայի հնարավոր փոխանցման առնչությամբ:
Պարբերականը հիշեցնում է, որ Փաշինյանն օգոստոսի 24-ին հաղորդել էր, որ Երևանը Մոսկվային խնդրում է հանրապետության երկաթուղիների կառավարման կոնցեսիան վաճառել երրորդ երկրի, որն ընդունելի է երկու կողմերի համար: Փաշինյանի խոսքով ՝ նման առաջարկի պատճառ են դարձել այն ռիսկերը, որոնք Արևմտյան ներդրողները և միջազգային փոխադրումների մասնակիցները կապում են Ռուսաստանի դեմ պատժամիջոցային սահմանափակումների հետ։
Ռուսական երկաթուղիների ղեկավար Օլեգ Բելոզյորովը սեպտեմբերի 1-ին "Իզվեստիա"-ին հաղորդել է, որ Ռուսաստանը մշտական կապի մեջ է հայ գործընկերների հետ երկաթուղիների հարցերով, պայմանագրի բոլոր կետերն իրականացվում են արձանագրված համաձայնություններին համապատասխան: Նա նաև նշել է, որ ոչ մի քաղաքական իրադարձություն չի ազդում երկրների երկկողմ համագործակցության վրա, աշխատանքը շարունակվում է: Եթե կառավարության մակարդակով ինչ-որ լրացուցիչ որոշումներ լինեն, ապա Ռուսական երկաթուղիներն անպայման կկատարի դրանք։
Հիշեցնենք, որ օգոստոսի 27-ին ճեպազրույցում Փաշինյանն ասել է, որ այս պահին չկան գրավոր առաջարկներ ներդրողներից, որոնք պատրաստ են 400 մլն դոլար վճարել Հայաստանի երկաթուղիների կոնցեսիայի համար։ Նրա խոսքով ՝ ԱԺ-ում իր հնչեցրած 400 մլն դոլարը վերաբերում էր բանավոր պայմանավորվածությանը ։ Փաշինյանն ընդգծել է, որ կոնցեսիան երրորդ կողմին հանձնելու հնարավորության վերաբերյալ աշխատանքային քննարկումներ են ընթանում: Կոպիտ ասած՝ քննարկվում է այն հարցը, թե որքան արժե ապրանքը ։ "Այնպես չէ, որ որևէ մեկը գրավոր պարտավորություն կամ առաջարկություն է տվել, որ պատրաստ է 400 մլն դոլար վճարել, բայց բանավոր մակարդակով նման քննարկում կա", - ասել է Փաշինյանը:
Հիշեցնենք, որ "ՀԿԵ" ՓԲԸ-ն "Ռուսական երկաթուղիներ" ԲԲԸ-ի 100% դուստր ընկերությունն է: 2008 թվականի փետրվարի 13-ին Երևանում "Ռուսական երկաթուղիներ" ԲԲԸ-ի և Հայաստանի Հանրապետության միջև ստորագրվել է կոնցեսիոն պայմանագիր հանրապետության երկաթուղային տրանսպորտի համակարգը "ՀԿԵ" ՓԲԸ կառավարմանը հանձնելու մասին: Պայմանագրի համաձայն, կոնցեսիոն կառավարման ժամկետը 30 տարի է՝ կողմերի փոխադարձ համաձայնությամբ աշխատանքի առաջին քսան տարուց հետո ևս 10 տարով երկարաձգելու իրավունքով։ "ՀԿԵ" ՓԲԸ խնդիրների մեջ են մտնում ՀՀ երկաթուղու ենթակառուցվածքի արդիականացումը, Հայաստանին սահմանակից պետությունների հետ համագործակցության զարգացումը, ներհանրապետական և միջազգային ուղևորափոխադրումների և բեռնափոխադրումների զարգացումը: Ընկերության կողմից իրականացվող ներդրումների չափը կազմում է 572 մլն դոլար: "ՀԿԵ" ՓԲԸ իր գործունեությունը սկսել է 2008թ. հունիսի 1-ից։
