ԱրմԻնֆո. Այս տարվա հունիսի 1-ից մինչև հուլիսի 19-ը Հայաստանը արտահանել է 7.6 հազար տոննա ծիրան: Այս մասին իր Ֆեյսբուքյան էջում հայտարարել է ՀՀ էկոնոմիկայի նախարար Գևորգ Պապոյանը:
Նա նշել է, որ ներգրավված է եղել մոտ 380 բեռնատար:
Նախարարի խոսքով՝ արտահանման աշխարհագրությունը բավականին լայն է: Անդրադառնալով վերջերս շրջանառվող լուրերին, թե իբր իսպանական շուկա ուղարկված ծիրանը փչացել է, Պապոյանը ընդգծել է, որ Հայաստանն իր ծիրան չի արտահանել ո՛չ Իսպանիա, ո՛չ էլ Պորտուգալիա:
Հիշեցնենք, որ Ռուսաստանի լիազոր մարմինները՝ «Ռոսպոտրեբնադզորը» և «Ռոսսելխոզնադզորը», սահմանափակումներ են սահմանել Հայաստանից Եվրասիական տնտեսական միության (ԵԱՏՄ) շուկաներ գյուղատնտեսական արտադրանքի և ծաղիկների արտահանման վրա: Պատճառը, ինչպես նշվում է գործակալությունների պաշտոնական հայտարարություններում, հայտնաբերված խախտումներն են եղել:
Նշենք, որ Հայաստանն ավանդաբար իր թարմ գյուղատնտեսական արտադրանքի մոտ 90%-ը արտահանել է ռուսական շուկա: Ծաղիկները հիմնականում մատակարարվել են նաև ԵԱՏՄ և ԱՄԷ շուկաներին։
Ստեղծված իրավիճակին և հայ արտադրողների առջև ծառացած դժվարություններին ի պատասխան՝ կառավարությունը մշակել է մի քանի արտահանման աջակցության ծրագրեր եվրոպական շուկաների համար, այդ թվում՝ տրանսպորտային ծախսերի և մաքսային տուրքերի փոխհատուցում։
