Արմինֆո. Էկոնոմիկայի նախարարությունը պատրաստ է աջակցել "Արարատցեմենտ"գործարանի արտադրական գործունեության ընթացքում հնարավոր խնդիրների լուծմանը: Այդ մասին ասել է ՀՀ էկոնոմիկայի նախարարի տեղակալ Էդգար Զաքարյանը ցեմենտի գործարան այցի ժամանակ, որտեղ տեղում ծանոթացել է արտադրական գործընթացի կազմակերպմանը: Այցի ընթացքում նրան ուղեկցել է ձեռնարկության գլխավոր տնօրենը։
Խոսելով ձեռնարկության աշխատանքի վերսկսման մասին ՝ Զաքարյանը նշել է, որ արտադրական անխափան և շարունակական գործընթացը կարևոր նշանակություն ունի ինչպես արդյունաբերական ներուժի պահպանման, այնպես էլ տնտեսական ակտիվության խթանման համար:
Հիշեցնենք, որ "Բարգավաճ Հայաստան" կուսակցության առաջնորդ Գագիկ Ծառուկյանին պատկանող "Արարատցեմենտ" գործարանի աշխատակիցները բողոքի ակցիա են իրականացրել ձեռնարկության տարածքում՝ պահանջելով վերսկսել գործարանի աշխատանքը՝ իրավապահ մարմինների կողմից իրականացված քննչական գործողություններից հետո:
Դեպքի վայրից հեռարձակվող հաղորդումների համաձայն, գործարանի մոտ հերթապահում էին Հայաստանի ՆԳՆ Ոստիկանության բավականին մեծ թվով աշխատակիցներ։ Գործարանը պարապուրդի է մատնված 4 օրը՝ հուլիսի 6-ին գործարանում իրականացված քննչական միջոցառումներից հետո։
Հիշեցնենք, որ հուլիսի 6-ին իրավապահները խուզարկություններ էին իրականացրել ԲՀԿ առաջնորդ Գագիկ Ծառուկյանի տանը, ինչպես նաև ավելի քան 70 հասցեներում, այդ թվում՝ Multi Group կոնցեռնի մեջ մտնող ընկերությունների մեծ մասում: Քննչական գործողությունների ավարտից հետո Ծառուկյանը ձերբակալվել էր և տեղափոխվել ՀՀ քննչական կոմիտե: Նրան մեղադրանք է առաջադրվել առերևույթ խարդախության և առանձնապես խոշոր չափերով դրամական միջոցներն օրինականացնելու համար: Նույն օրը դատարանի որոշմամբ Ծառուկյանը երկու ամսով կալանաավորվել է։ Ծառուկյանն՝ ինքը, հերքում է առաջադրված մեղադրանքները, նշելով, որ տեղի ունեցողը իշխանությունների քաղաքական դրդապատճառներով ճնշում է։
