Արմինֆո. Հայաստանն ընդգրկվել է աշխարհի այն երկրների տասնյակում, որտեղ բնակչության ընդհանուր թվում կանանց բաժինն առավելագույն է: Այդ մասին են վկայում Համաշխարհային բանկի տվյալները՝ հիմնված բնակչության տարիքային-սեռային բաշխման վրա, որը հաշվարկված է ըստ ՄԱԿ-ի ազգաբնակչության բաժնի World Population Prospects: 2022 Revision բազայի։
Վերջին տվյալների համաձայն, կանայք կազմում են Հայաստանի բնակչության 53,6% - ը, իսկ տղամարդիկ՝ մոտ 46,4% - ը: Այս ցուցանիշով հանրապետությունն աշխարհի երկրների առաջին տասնյակում զբաղեցնում է հինգերորդ տեղը։
Համեմատության համար նշենք, որ Հայաստանի հարևան պետություններից առավել մոտ ցուցանիշ ունի Վրաստանը, որտեղ կանայք կազմում են բնակչության 53,4% - ը, և տասնյակում 8-րդն է: Ադրբեջանում նրանց բաժինը գնահատվում է 51,0%, մինչդեռ, Թուրքիայում (50,1%) և Իրանում ( 49,2%) կանայք կազմում են բնակչության կեսից պակաս:
Նշենք, որ ըստ մասնագիտացված կառույցների տվյալների, չնայած բնակչության ընդհանուր թվում կանանց գերակշռությանը, ծնունդների ժամանակ Հայաստանում նախկինի պես պահպանվում է տղաների օգտին գենդերային դիսբալանսը: Վիճակագրական կոմիտեի տվյալներով ՝ 2024 թվականին հանրապետությունում ծնվել է 33 648 երեխա, որոնցից 17 614-ը՝ տղա, 16 034-ը ՝ աղջիկ: Այսպիսով, 100 նորածին աղջկան բաժին է ընկել մոտ 110 տղա (109,9), մինչդեռ, բնական կենսաբանական նորմ է համարվում 100 աղջկա հաշվով 104-106 տղա:
Ինչպես ավելի վաղ հաղորդել էր առողջապահության նախկին նախարար Արսեն Թորոսյանը, վերջին 30 տարում երկրում չի ծնվել շուրջ 80 հազար աղջիկ:
