Արմինֆո. Հայաստանն ու Իրանը պաշտոնապես հայտարարել են «Հյուսիս-Հարավ» միջազգային տրանսպորտային միջանցքի շրջանակներում Քաջարանի թունելի շինարարական աշխատանքների մեկնարկի մասին։
Ինչպես հայտնում է ՀՀ տարածքային կառավարման և ենթակառուցվածքների նախարարության մամուլի ծառայությունը, շինարարական աշխատանքների մեկնարկի պաշտոնական արարողությանը մասնակցել են Իրանի Իսլամական Հանրապետության փոխնախագահ Սեյեդ Համիդ Փուրմոհամադին, Հայաստանի փոխվարչապետ Մհեր Գրիգորյանը, ՀՀ տարածքային կառավարման և ենթակառուցվածքների նախարար Դավիթ Խուդաթյանը, դիվանագիտական կորպուսի ներկայացուցիչներ, Ազգային ժողովի պատգամավորներ և այլք։
7.2 կմ երկարությամբ թունելը հագեցած է լինելու բոլոր անհրաժեշտ ժամանակակից համակարգերով, այդ թվում՝ էլեկտրամատակարարման և էլեկտրաէներգիայի բաշխման, լուսավորության, օդափոխության, տեսահսկման, հրդեհի հայտնաբերման և մարման ավտոմատացված համակարգերով, ինչպես նաև ռադիոհեռարձակման, տարհանման ազդարարման և ճանապարհային լուսային ցուցիչների, տարհանման ելքերի օդափոխության ու պաշտպանության համակարգերով, SOS կայաններով և կառավարման կենտրոնով։
Թունելի ներսում ճանապարհն ունենալու է երկու երթևեկելի գոտի և մայթեր՝ 10.6 մետր ընդհանուր լայնությամբ։ Բացի այդ, տրանսպորտային միջոցների հարկադիր կանգառի հնարավորությունն ապահովելու համար յուրաքանչյուր 250 մետրը մեկ նախատեսված է թունելի երթևեկելի մասի ընդլայնում՝ լրացուցիչ 3 մետրով։
Արտակարգ իրավիճակների դեպքում տարհանման նպատակով թունելի տակ կառուցվելու է նաև տարհանման ելք։
Նախագծի շրջանակներում կառուցվելու է շուրջ 4 կմ երկարությամբ մոտեցնող ճանապարհներ, որոնք թունելը կկապեն գործող ճանապարհային ցանցին։ Շինարարության ավարտից հետո գործող երթուղու երկարությունը կկրճատվի մոտ 14 կմ-ով, տրանսպորտային միջոցների երթևեկության միջին արագությունը 50 կմ/ժ-ից կբարձրանա մինչև 80 կմ/ժ, իսկ ճանապարհի վրա ծախսվող ժամանակը կնվազի շուրջ 40 րոպեով։
Թունելը կանցնի ծովի մակերևույթից 2535 մետր բարձրության վրա գտնվող Մեղրու լեռնանցքի շրջանցմամբ, ինչը զգալիորեն կբարձրացնի ճանապարհային երթևեկության անվտանգությունը և թույլ կտա խուսափել ձմռան ամիսներին լեռնանցքի անցանելիության ապահովման դժվարություններից։
Քաջարանի թունելի շինարարության նախագիծը կիրականացվի Կայունացման և զարգացման եվրասիական հիմնադրամի 200 մլն դոլարի չափով վարկային միջոցների և Հայաստանի Հանրապետության կողմից շուրջ 195 մլն դոլարի չափով համաֆինանսավորման հաշվին։
Շինարարական աշխատանքները կսկսվեն 2026 թվականին, իսկ դրանք ավարտել նախատեսվում է վեց տարվա ընթացքում։ Քաջարանի թունելի և մոտեցնող ճանապարհների շինարարության պայմանագիրը կկնքվի իրանական «Abad Rahan Pars International Group» և «Tunnel Sadd Ariana» ընկերությունների համատեղ ձեռնարկության հետ։
Հայաստանում Իրանի դեսպանատան հաղորդագրության համաձայն՝ արարողության ընթացքում երկու երկրների ներկայացուցիչներն ընդգծել են «Հյուսիս-Հարավ» միջազգային տրանսպորտային միջանցքի շրջանակներում Նորդուզի սահմանային կետից մինչև Երևան ավտոճանապարհի զարգացման կարևորությունը։ Նրանք նշել են դրա առանցքային նշանակությունը Հայաստանի և Իրանի միջև առևտրի, տրանսպորտային հաղորդակցության և տարանցիկ փոխադրումների հետագա ընդլայնման համար։
Արարողությունից հետո պաշտոնատար անձինք այցելել են նաև կառուցվող ճանապարհի առանձին հատվածներ։
