Արմինֆո.ՀՀ պետական եկամուտների կոմիտեն հիշեցնում է, որ 2026 թվականի հուլիսի 1-ից ուժի մեջ են մտնում Հարկային օրենսգրքի փոփոխությունները, որոնցով փոխվում է չվճարված հարկային պարտավորությունների գանձման կարգը։
Համաձայն նոր դրույթի՝ հարկային պարտավորության առաջացման օրը հարկ վճարողին էլեկտրոնային համակարգի միջոցով կուղարկվի հիշեցում: Եթե հարկային պարտավորությունը չվճարվի հիշեցումն ուղարկելուց հետո 7 օրացուցային օրվա ընթացքում, իսկ հարկ վճարողի կողմից ներկայացված առարկությունները չընդունվեն կամ առարկություններ չներկայացվեն, հարկային մարմինը նույն օրը որոշում կկայացնի չվճարված հարկային պարտավորության գանձման, ինչպես նաև չվճարված պարտավորության չափով հարկ վճարողի բանկային հաշիվների, շարժական և անշարժ գույքի վրա արգելանք դնելու մասին:
Եթե հարկային պարտավորությունը չմարվի արգելանք դնելու օրվանից 30 օրվա ընթացքում, հարկային մարմնի որոշումները կփոխանցվեն Հարկադիր կատարումն ապահովող ծառայություն՝ հարկադիր գանձում իրականացնելու համար:
«ՊԵԿ-ը հորդորում է հարկ վճարողներին պարբերաբար հետևել իրենց հարկային պարտավորությունների կատարմանը և դրանք կատարել օրենքով սահմանված ժամկետներում՝ հարկադիր միջոցների կիրառումը բացառելու համար»,- ասված է հաղորդագրության մեջ:
