Արմինֆո.Առաջին անգամ Հայաստանի զբոսաշրջության կոմիտեն և CNN միջազգային մեդիացանցը սկսում են համատեղ խոշոր մարքեթինգային արշավ։
Ինչպես նշված է գերատեսչության պաշտոնական հաղորդագրության մեջ, արշավի շրջանակներում Հայաստանի զբոսաշրջային տեսարժան վայրերն ու գրավիչ ուղղությունները մի քանի ամիս շարունակ կներկայացվեն CNN-ի պաշտոնական կայքում։
«Այս համագործակցությունը կարևոր քայլ է Հայաստանի միջազգային ճանաչելիության բարձրացման և երկիրը որպես գրավիչ զբոսաշրջային ուղղություն խթանելու ճանապարհին»,- նշված է աղբյուրում։
Նշենք, որ CNN-ը (Cable News Network) աշխարհի խոշորագույն միջազգային լրատվական հեռուստաալիքներից և մեդիահոլդինգներից է, որը հիմնադրվել է 1980 թվականին ԱՄՆ-ում։ CNN-ը դարձավ աշխարհում առաջին շուրջօրյա լրատվական հեռուստաալիքը և այսօր դասվում է համաշխարհային ամենաազդեցիկ լրատվամիջոցների շարքին։
Ցանցը հեռարձակվում է ավելի քան 200 երկրներում և տարածքներում՝ հեռուստաալիքների, թվային հարթակների և պաշտոնական կայքի միջոցով՝ ապահովելով լուրեր, վերլուծական նյութեր, ռեպորտաժներ և հատուկ նախագծեր ողջ աշխարհի բազմամիլիոնանոց լսարանի համար։
Զբոսաշրջության կոմիտեի տվյալներով՝ 2026 թվականի հունվար-մայիս ամիսներին Հայաստան է այցելել 825.4 հազար զբոսաշրջիկ, ինչը 19,3%-ով գերազանցում է նախորդ տարվա նույն ժամանակահատվածի ցուցանիշը։
