Արմինֆո.Արտահանման շուկաների դիվերսիֆիկացման քաղաքականության մեջ Հայաստանը լուրջ հաջողություններ է արձանագրել։ Այս մասին մայիսի 21-ին լրագրողների հետ ճեպազրույցի ժամանակ ասել է ՀՀ էկոնոմիկայի նախարար Գևորգ Պապոյանը։
Մասնավորապես, նա հայտնել է, որ այս տարվա հունվար-ապրիլ ամիսներին Հայաստանից արտահանումը դեպի Չինաստան և ԵՄ երկրներ կրկնապատկվել է։ «Սա մեր շարունակական քաղաքականության արդյունքն է։ Եվ մենք պետք է շարունակենք այս աշխատանքը, որպեսզի 2-3 տարի հետո Հայաստանը կախվածություն չունենա ոչ մի շուկայից։ Եվ այս կամ այն շուկայի հետ կապված խնդիրները էական ազդեցություն չունենան մեր տնտեսության վրա»,- ասել է նախարարը։
Նշենք, որ ըստ ՀՀ վիճակագրական կոմիտեի տվյալների՝ 2026 թվականի առաջին եռամսյակում Հայաստանի և ԵՄ երկրների միջև արտաքին առևտրաշրջանառությունն աճել է 54,3%-ով՝ գերազանցելով 763,2 միլիոն դոլարը։ Ընդ որում, արտահանման ծավալներն աճել են 89,8%-ով՝ հասնելով 248,7 միլիոն դոլարի, ներմուծման 41,5% աճի ֆոնին, որը կազմել է 514,5 միլիոն դոլար։ Չինաստանի հետ փոխադարձ առևտուրը հաշվետու ժամանակահատվածում արձանագրել է 19,6% աճ՝ կազմելով 701,7 միլիոն դոլար։ Արտահանման մասով գրանցվել է 2,3 անգամ աճ՝ ապահովելով 251,3 միլիոն դոլարի ծավալ, այն դեպքում, երբ ներմուծումը նվազել է 6,1%-ով՝ հասնելով 450,4 միլիոն դոլարի։
