Արմինֆո.ՀՀ Ազգային ժողովի առողջապահության հարցերի մշտական հանձնաժողովում քննարկվել են «Դեղերի մասին» օրենքում փոփոխություններ կատարելու մասին նախագծերը։
Ինչպես իր ելույթում նշել է ՀՀ առողջապահության նախարարի տեղակալ Աստղիկ Գրիգորյանը, օրինագծի ընդունումը պայմանավորված է դեղերի շրջանառության կարգավորման ոլորտում առկա անհամապատասխանությունները վերացնելու, դեղերի որակի, անվտանգության և հասանելիության ապահովման ավելի հստակ գործիքակազմ ներդնելու, վերահսկողական գործառույթներն արդյունավետ իրականացնելու, ինչպես նաև ՀՀ օրենսդրությունը Եվրասիական տնտեսական միության շրջանակներում ընդունված նորմերին համապատասխանեցնելու անհրաժեշտությամբ։
Փոխնախարարը հայտնել է, որ օրենքի կիրարկման ընթացքում ի հայտ են եկել մի շարք բացթողումներ, հակասություններ, ինչպես նաև անհամապատասխանություններ, որոնք խոչընդոտում են ոլորտի լիարժեք կարգավորմանը։ Օրենքի նախագծով առաջարկվում է մի շարք փոփոխություններ և լրացումներ կատարել օրենքի 21-րդ հոդվածում, որոնցով կթույլատրվի չգրանցված, բայց հիմնական դեղերի ցանկում ընդգրկված դեղամիջոցների, ինչպես նաև ուռուցքաբանության մեջ օգտագործվող հակաուռուցքային և իմունամոդուլացնող պրեպարատների ներմուծումը, քանի որ հնարավոր չէ երաշխավորել Հայաստանի Հանրապետության հիմնական դեղերի ցանկում միայն գրանցված դեղերի առկայությունը՝ թեկուզ գրանցման սահմանափակ ժամկետի պատճառով։ Բացի այդ, կան բազմաթիվ դեպքեր, երբ գրանցված դեղամիջոցը երկար ժամանակ չի ներմուծվում և բացակայում է շուկայից։ Միաժամանակ առաջարկվում է հստակեցնել ներմուծման հավաստագրի տրամադրումը մերժելու հիմքերը։
Ակնկալվում է, որ օրենքի նախագծի ընդունումը կնպաստի դեղերի շրջանառության ոլորտի առավել հստակ ու համապարփակ կարգավորմանը, դեղերի որակի, անվտանգության, հասանելիության և անխափան մատակարարման ապահովմանը։
