Արմինֆո.Հայաստանի Սննդամթերքի անվտանգության տեսչական մարմնի հրավերով երկրում է գտնվում Ռուսաստանի Անասնաբուժական և բուսասանիտարական վերահսկողության դաշնային ծառայության («Ռոսսելխոզնադզոր») պատվիրակությունը։
Պատվիրակության կազմում ընդգրկված են անասնաբուժության և բուսասանիտարիայի ոլորտի մասնագետներ։
Ինչպես հայտնում է Տեսչական մարմնի մամուլի ծառայությունը, առաջիկա յոթ օրվա ընթացքում նախատեսվում է վերահսկողական միջոցառումներ իրականացնել հայկական մի շարք ձեռնարկություններում՝ բուսաբուծական 8 և ձկնաբուծական 4, նպատակ ունենալով ստուգել Հայաստանից Ռուսաստան արտահանվող արտադրանքի համապատասխանությունը ԵԱՏՄ օրենսդրության պահանջներին և նորմերին։
Աղբյուրի համաձայն՝ Հայաստանի վերահսկողական մարմնի ղեկավար Տիգրան Պետրոսյանի գլխավորությամբ ռուս գործընկերների հետ քննարկումներ են անցկացվել վերահսկողական միջոցառումների պլանում ներառված հարցերի շուրջ։
Ռուսական պատվիրակության ղեկավար Ալեքսեյ Շչեգլովը հայ գործընկերներին է փոխանցել «Ռոսսելխոզնադզորի» ղեկավար Սերգեյ Դանկվերտի ողջույնները և շնորհակալություն հայտնել ստեղծված իրավիճակին արագ արձագանքելու, ինչպես նաև համատեղ վերահսկողական միջոցառումներ կազմակերպելու պատրաստակամության համար։
Տիգրան Պետրոսյանը վստահեցրել է, որ երկու երկրների իրավասու մարմինների համագործակցությունը միշտ կրելու է կառուցողական բնույթ։
Նշենք, որ այսօր «Ռոսսելխոզնադզորը» հրապարակել է հայտարարություն, որում ասվում է, որ 2026 թվականի մայիսի 22-ից դաշնային ծառայությունը ժամանակավոր սահմանափակումներ է մտցնում Հայաստանից ծաղկային արտադրանքի ներմուծման նկատմամբ՝ մինչև ջերմոցային տնտեսությունների տեսչական ստուգումների ավարտը և դրանց արդյունքների վերլուծության ամփոփումը։ «Չնայած Հայաստանի սննդամթերքի անվտանգության տեսչական մարմնի ներկայացրած երաշխիքներին, ԵԱՏՄ-ի համար կարանտինային օբյեկտների հայտնաբերումը շարունակվում է։ 96,2 միլիոն հատ ծաղկային արտադրանքի ներմուծման ժամանակ հայտնաբերվել է 135 դեպք։ Դա կազմում է 2025 թվականի ողջ ընթացքում հայտնաբերված ընդհանուր քանակի 77%-ը»,- հայտնել են տեսչական մարմնից։
