Արմինֆո. Հայաստանի իշխանությունների գլխավոր նպատակը թոշակառուների համար սեփական կենսաթոշակով նորմալ կյանքով ապրելու հնարավորությունն ապահովելն է։ Այս մասին Արագածոտնի մարզի Արագած գյուղում քարոզարշավի ժամանակ հայտարարել է վարչապետ Նիկոլ Փաշինյանը։
Նրա խոսքով՝ 2018 թվականին երկրում նվազագույն կենսաթոշակը կազմում էր 16 հազար դրամ, իսկ այսօր այն արդեն հավասար է 46 հազար դրամի, այսինքն՝ 8 տարում թոշակներն աճել են գրեթե երեք անգամ։ Այն ժամանակ՝ 2018 թվականին, ինչպես նշել է Փաշինյանը, թոշակառուն իր կենսաթոշակով չէր կարողանում ապահովել անգամ իր նվազագույն պարենային զամբյուղը (ՆՊԶ), որը գրեթե երկու անգամ գերազանցում էր նվազագույն թոշակի չափը։ 2018 թվականին իշխանության եկած քաղաքական ուժը սկզբում կրկնապատկեց այդ չափը՝ հասցնելով 32 հազար դրամի, բայց դա էլ բավարար չէր ՆՊԶ-ն ապահովելու համար։ 2023 թվականին հնարավորություն ընձեռվեց ՆՊԶ-ի չափը համապատասխանեցնել նվազագույն կենսաթոշակի չափին։ Այսօր, ինչպես նշել է Փաշինյանը, արդեն կենսաթոշակի միջին չափը համապատասխանում է նվազագույն սպառողական զամբյուղի չափին, այսինքն՝ թոշակառուն, բացի սննդամթերքից, հնարավորություն է ստացել ձեռք բերել նաև որոշ կենցաղային իրեր։ Դրանով իսկ, շարունակել է կառավարության ղեկավարը, տեղի է ունեցել մեծ և շատ էական փոփոխություն։
Փաշինյանը նկատել է, որ համաձայն «Քաղաքացիական պայմանագիր» կուսակցության նախընտրական ծրագրի՝ սպառողական զամբյուղի միջին չափի վրա ազդող գնաճային ճնշումների դեպքում կիրականացվի ֆինանսական միջոցների ինդեքսավորում այն ծավալով, որքանով կարձանագրվի գների աճը։ Դա, ինչպես նշել է վարչապետը, անհրաժեշտ է կենսաթոշակների միջին չափը պահպանելու համար։ Բայց հնարավորությունների հայտնվելու դեպքում կբարձրացվի նաև բուն կենսաթոշակը, իսկ դրա համար պետք է աշխատել, իսկ վաստակած փողերը ծախսել պետական մտածողությամբ։ «Ես բազմիցս ասել եմ և կկրկնեմ՝ գնումներ կատարելիս պահանջեք հսկիչ-դրամարկղային մեքենաների կտրոններ։ Այսօր երկրում բազմաթիվ խնդիրներ լուծվել են, այդ թվում՝ ստվերային շրջանառության զգալի կրճատման միջոցով»,- նշել է Փաշինյանը։ Նա հավելել է, որ անցած 8 տարիների ընթացքում Հայաստանի պետական բյուջեն լրացուցիչ համալրվել է 6,6 միլիարդ դոլարով, որոնք մինչև հեղափոխությունն ուղղվում էին որոշակի անձանց գրպանները։ Նշված ժամանակահատվածում միայն «Զանգեզուրի պղնձամոլիբդենային կոմբինատը» պետական գանձարան է վճարել լրացուցիչ շուրջ 300 միլիարդ դրամ, ինչը շատ ավելին է, քան նախորդ 8 տարիներին։ Այսպիսով, քայլ առ քայլ ընդլայնվել են պետբյուջեի հնարավորությունները, ինչի արդյունքում 2026 թվականին կենսաթոշակների բարձրացմանն ուղղվել է լրացուցիչ 70 միլիարդ դրամ։ Վարչապետը հիշեցրել է, որ վերջերս ԱՄՆ-ում վաճառվել է ՀՀ ֆինանսների նախկին նախարար Գագիկ Խաչատրյանի առանձնատունը, և հիմա ընթանում է այդ միջոցները Հայաստան վերադարձնելու գործընթացը, որը կստանա վաճառքի ընդհանուր գումարի 60-70%-ը։ Քաղաքացիներին են վերադարձվել նաև ժողովրդից գողացված բազմաթիվ տարածքներ։
«Պատերազմի եռագլուխ կուսակցությունը («Ուժեղ Հայաստան», «Բարգավաճ Հայաստան» կուսակցությունները և «Հայաստան» դաշինքը) անընդհատ հայտարարում է, թե իբր վերադարձված հափշտակված միջոցները չեն երևում։ Մենք թալանածը վերադարձրել ենք ու վերադարձնելու ենք, բայց ամենահետաքրքիրն այն է, որ նրանց ծրագրերից ոչ մեկում թալանածը վերադարձնելու մասին հիշատակում անգամ չկա։ Այսինքն՝ նրանք դրանով իսկ ցանկանում են փակել այդ թեման։ Եռագլուխ մաֆիայի գրեթե բոլոր ղեկավարներն այժմ իրենց գույքով և յուրացված միջոցներով գտնվում են դատական քննությունների փուլում։ Ե՛վ Ռոբերտ Քոչարյանը, և՛ Սերժ Սարգսյանը, և՛ մյուսներն այժմ դատվում են»,- ասել է վարչապետը՝ հիշեցնելով իրավիճակը նաև «Բարգավաճ Հայաստան» կուսակցության առաջնորդ Գագիկ Ծառուկյանի հետ, ում որդին գտնվում է փախուստի մեջ (Բելառուսում - խմբ․)՝ զենքի գործադրմամբ իրավախախտում կատարելու համար։
Փաշինյանը պատմել է նաև պարտադիր բժշկական ապահովագրության համակարգի մասին, որն սկսել է գործել տարեսկզբից։
