Գալուզին․ "Ռոսատոմ"-ը պատրաստ է ամենասեղմ ժամկետներում ձեռնամուխ լինել Հայաստանում նոր ԱԷԿ-ի կառուցման նախագծի իրագործմանը

Արմինֆո.  Ատոմային էլեկտրակայանի (ԱԷԿ) կառուցման թեման կարևոր տեղ է զբաղեցնում Մոսկվայի և Երևանի հարաբերությունների օրակարգում և կանոնավոր քննարկվում է տարբեր մակարդակներում: Այդ մասին հայտարարել է Ռուսաստանի փոխարտգործնախարար Միխայիլ Գալուզինը, հաղորդում է "Իզվեստիա" թերթը։

"Ռոսատոմ"-ը պատրաստ է հնարավորինս սեղմ ժամկետներում ձեռնամուխ լինել նախագծի իրագործմանը, իհարկե՝ հաշվի առնելով հայ բարեկամների ցանկությունը։ Հուսալի, արդեն ստուգված տեխնոլոգիաների առկայության, ինչպես նաեւ ֆինանսական պարամետրերի գրավչության տեսանկյունից իրական այլընտրանքներ չեն դիտարկվում, այդ թվում ՝ հաշվի առնելով շինարարությունը, հետագա շահագործումը, մասնագետների պատրաստման եւ վերապատրաստման անհրաժեշտությունը", - Գալուզինի խոսքը մեջբերում է թերթը։

Թերթը նաև հիշեցնում է, որ փետրվարի 6-ին տեղի է ունեցել "Ռոսատոմ" պետական կորպորացիայի ղեկավար Ալեքսեյ Լիխաչովի հանդիպումը ՀՀ Ազգային ժողովի նախագահ Ալեն Սիմոնյանի հետ, իսկ 2025 թվականի սեպտեմբերին ՀՀ վարչապետ Նիկոլ Փաշինյանը Մոսկվայում մասնակցել է համաշխարհային ատոմային շաբաթին:

Հիշեցնենք, որ ավելի վաղ Հայաստանում քննարկվում էր 50-60 ՄՎտ հզորությամբ մի քանի փոքր մոդուլային ատոմային ռեակտորների կառուցման հնարավորությունը: Ընդ որում, դիտարկվում էր, նույնիսկ, երկրի մի քանի մարզերում դրանց կառուցման հնարավորությունը։ Սակայն այս ուղղությամբ ամենագլխավոր խնդիրներից մեկը հայ ատոմագործների շրջանում այդ ռեակտորների կառավարման հմտությունների բացակայությունն է։ Ավելի վաղ Հայկական ԱԷԿ-ի գլխավոր տնօրենի խորհրդական Գերա Սևիկյանը ԱրմԻնֆո-ին հաղորդնել էր, որ սկզբունքային որոշում է կայացվել երկրում նոր բլոկ կառուցելու մասին ՝ օգտագործելով ռուսական ՏՕԻ ռեակտորը՝ 1200 Մվտ հզորությամբ: Սակայն, ինչպես հետագայում նշել էր ՀՀ տարածքային կառավարման և ենթակառուցվածքների նախարար Գնել Սանոսյանը, նման հզորության բլոկի կառուցումը հղի է խնդիրներով, քանի որ Հայաստանի ամբողջ էներգետիկ համակարգի հզորությունները կազմում են հենց 1200 Մվտ: Իսկ արդեն ավելի ուշ Հայաստանի վարչապետ Նիկոլ Փաշինյանը հայտարարել է, որ հանրապետությունը սկզբունքային որոշում է կայացրել կառուցել մոդուլային տիպի ատոմային ռեակտոր։ Ընդ որում, մոդուլային ատոմակայանի արտադրության երկիրը, Հայաստանի իշխանությունների հավաստմամբ, կորոշվի 2026-2027 թվականներին։