ՀՀ ԿԲ ղեկավար․ Հայաստանը ներդրել է ռիսկերի կառավարման նոր շրջանակ

Արմինֆո.  ԿԲ նախագահ Մարտին Գալստյանը մասնակցել է «Amundi Investment Outlook 2026: Keep it Turning» ներդրումային ֆորումին, որը կազմակերպել էր Ամունդի ընկերությունը։

Հայաստանի ԿԲ հաղորդագրության համաձայն, ֆորումը համախմբել էր ֆինանսաբանկային և ներդրումային ոլորտի առաջատար ներկայացուցիչներին՝ նպատակ ունենալով նպաստել փորձի փոխանակմանը և միջազգային զարգացումների շուրջ մասնագիտական երկխոսությանը։

Միջոցառման շրջանակում Կենտրոնական բանկի նախագահ Մարտին Գալստյանը, Ամունդի-Ակբայի գործադիր տնօրեն Ժան Մազեջյանը և Ամունդի խմբի գլխավոր ներդրումային տնօրեն Վինսենթ Մորտիեն պանելային քննարկման ընթացքում անդրադարձել են աշխարհաքաղաքական և մակրոտնտեսական զարգացումներին, ինչպես նաև դրանց ազդեցությանը ֆինանսական շուկաների և ներդրումային միջավայրի վրա։

ԿԲ նախագահը խոսել է համաշխարհային տնտեսության առջև ծառացած հիմնական ռիսկերի մասին՝ ընդգծելով շարունակվող գնաճը, առաջատար տնտեսություններում դանդաղ աճը և աճող աշխարհաքաղաքական բևեռացումը։ Նա նշել է, որ կենտրոնական բանկերը պետք է վերանայեն ավանդական քաղաքականության մշակման մոտեցումները անորոշության պայմաններում՝ ընդգծելով, որ Հայաստանը դրամավարկային քաղաքականության մեջ ներդրել է ռիսկերի կառավարման նոր շրջանակ և բարձրացրել է թափանցիկության մակարդակը։

Ֆորումի ընթացքում Ամունդի խմբի գլխավոր ներդրումային տնօրեն Վինսենթ Մորտիեն ներկայացրել է 2026 թվականի գլոբալ ներդրումային հեռանկարները:

Հիշեցնենք, որ "Ամունդի-Ակբա Ասեթ Մենեջմենթ" ՓԲԸ-ն հիմնադրվել է 2013 թվականին: Ընկերությունը կառավարում է երեք պարտադիր կուտակային կենսաթոշակային հիմնադրամ' հավասարակշռված, պահպանողական և կայուն եկամտաբեր: Ընկերության բաժնետերերն են 35 երկրներում ավելի քան 2,32 տրիլիոն եվրոյի չափով ակտիվների (2025 թվականի սեպտեմբերի 30-ի դրությամբ) կառավարիչ ֆրանսիական Amundi ընկերությունը (51%) և հայկական Acba Bank - ը (49%), որը Հայաստանի խոշորագույն ֆինանսական ինստիտուտներից մեկն է․ ունի 66 մասնաճյուղ:

2025 թվականի դեկտեմբերին Amundi-Acba Asset Management երեք հիմնադրամների մասնակիցների թիվը հասել է 558 հազարի (2024 թվականի դեկտեմբերին ՝ 510 հազար), կառավարվող ակտիվների ծավալը՝ 750 մլրդ դրամ (ակտիվները 2026 թվականի հունվարի 30 - ի դրությամբ կազմել են մոտ 772 մլրդ դրամ)։

Միայն 2025 թվականին Ամունդի-Ակբա հիմնադրամների կողմից կառավարվող ակտիվների ծավալն աճել է 185 մլրդ դրամով։ Դրանից 75 մլրդ դրամ (40%) ստացվել է կառավարման եկամուտից, իսկ 110 մլրդ դրամ (մոտ 64%)՝ կուտակային վճարներից։ «Եթե դիտարկենք դինամիկան, ապա վերջին տարիներին ակտիվների միջին տարեկան աճը կազմել է ավելի քան 30%, որից 26%-ը կամ 195 մլրդ դրամը ստացվել է կառավարման եկամուտի հաշվին», - օրերս հայտարարել է ընկերության գլխավոր ներդրումային տնօրեն Հրայր Ասլանյանը։ ՀՀ-ում կուտակային կենսաթոշակային համակարգի ներդրումից ի վեր ընկերության կողմից կառավարվող քաղաքացիների կենսաթոշակային հաշիվների միջին տարեկան եկամտաբերությունը հասել է 7,5 -, 8,2 տոկոսի: Այսպես, ֆոնդերի եկամտաբերությունը 2025 թվականի համար կազմել է․ Amundi - Acba (AMCON) հավասարակշռված ֆոնդ (10 մլրդ դրամ) ՝ +12%, Amundi-Acba (AMBAL) պահպանողական ֆոնդ (734 մլրդ դրամ)՝ +12,4%, կայուն եկամտաբեր ֆոնդ (AMFIX) (6,8 մլրդ դրամ)՝ +10,1%: