Թրամփը հրամանագիր է ստորագրել Իրանի հետ առևտուր անող երկրների համար սակագների բարձրացման մասին

Արմինֆո.  ԱՄՆ նախագահ Դոնալդ Թրամփը փետրվարի 6-ին իր վարչակազմին թույլատրել է մաքսատուրքեր սահմանել այն երկրների ապրանքների համար, որոնք բիզնես են վարում Ռուսաստանի հետ: Ընդ որում, նա հրաժարվել է դրանք անմիջապես կիրառել, հաղորդում է Bloomberg-ը։

Նշվում է, որ Թրամփը ստորագրել է հրամանագիր, որի համաձայն, ԱՄՆ-ը կարող է լրացուցիչ մաքսատուրքեր սահմանել ցանկացած երկրից ներմուծման համար, որն ուղղակի կամ անուղղակի կերպով գնում, ներմուծում կամ այլ կերպ ձեռք է բերում ապրանքներ կամ ծառայություններ Իրանում:

Նման հրամանագրից հետո պետքարտուղարը և առևտրի նախարարն՝ ԱՄՆ առևտրի ներկայացուցչի գրասենյակի և Ներքին անվտանգության նախարարության հետ համատեղ, կարող են որոշել, թե որքանով պետք է կիրառվի լրացուցիչ սակագինը:

Միևնույն ժամանակ, Թրամփը չի հստակեցրել, թե կոնկրետ ինչ դրույքաչափ է սահմանվելու, սակայն, այնուամենայնիվ, օրինակ է բերել այն  սակագինը, որով ի սկզբանե սպառնում էր Իրանի առևտրային գործընկերներին:

"Այս կարգադրության ուժի մեջ մտնելու օրվանից սկսած՝ ԱՄՆ ներմուծվող ապրանքների համար, որոնք ցանկացած երկրի արտադրանք են, որոնք ուղղակիորեն կամ անուղղակիորեն գնում, ներմուծում կամ այլ կերպ ձեռք են բերում Իրանից ցանկացած ապրանք կամ ծառայություն, կարող է լրացուցիչ ադվալորային տուրք սահմանվել, օրինակ, 25%-ի չափով", - ասվում է փաստաթղթում։

Հրամանագրում նշվում է, որ "նախագահը Իրանի վրա է դնում միջուկային հնարավորություններ ձեռք բերելու, ահաբեկչությանն աջակցելու, բալիստիկ հրթիռների մշակման եւ տարածաշրջանային ապակայունացման ձգտման համար պատասխանատվությունը, որոնք սպառնալիք են ստեղծում ԱՄՆ-ի անվտանգության, դաշնակիցների եւ շահերի համար":

Իրանն առայժմ չի մեկնաբանել Վաշինգտոնի նոր քայլը։

Ինչպես հաղորդում է BBC-ի ռուսական ծառայությունը, իրանական արտահանման գլխավոր հոդվածը մնում է հում նավթը: Ինչպես հունվարի 12-ին հաղորդել Է Reuters գործակալությունը, վկայակոչելով Kpler վերլուծական ընկերության տվյալները, իրանական մատակարարումների մոտ 80 տոկոսն ուղղվում է Չինաստան ։ Չինական մաքսային վիճակագրության մեջ 2022 թվականից բացակայում են Իրանից նավթի ուղղակի մատակարարումները, սակայն վերլուծաբանները դա բացատրում են այն հանգամանքով, որ հումքը վերբեռնվում է երրորդ երկրներում եւ ձեւակերպվում որպես մալայզիական կամ ինդոնեզական։

Հայաստանը նույնպես առևտուր է անում Իրանի հետ։ Ներկայումս ապրանքաշրջանառությունը կազմում է մոտ 1 մլրդ դոլար: Ավելի վաղ Հայաստանի վարչապետ Նիկոլ Փաշինյանն Իրանի նախագահ Մասուդ Փեզեշքիանի հետ համատեղ ճեպազրույցում հայտարարել էր, որ երկրները մտադիր են երկկողմ ապրանքաշրջանառության ծավալը հասցնել 3 մլրդ դոլարի: