ՀՀ կենտրոնական բանկը 2026թ. փետրվարին որոշել է վերաֆինանսավորման տոկոսադրույքը պահպանել 6.5% մակարդակում

Արմինֆո.  Հայաստանի Կենտրոնական բանկը 2026 թվականի փետրվարին որոշել է վերաֆինանսավորման տոկոսադրույքը պահպանել 6.5% մակարդակում: Նման որոշում է կայացվել փետրվարի 3-ին ՀՀ ԿԲ խորհրդի նիստում, որի համաձայն, նախկին 8% մակարդակում են պահպանվել նաև լոմբարդային ռեպո տոկոսադրույքները, իսկ բանկերից ներգրավված ավանդների տոկոսադրույքները՝ 5%:

 Ընդհանուր առմամբ, 2023 թվականի կեսերից մինչև 2026 թվականն առանցքային տոկոսադրույքն իջեցվել է 4,25 տ.կ.- ով (պատմականորեն առավելագույն 10,75%-ից)։ Ըստ այդմ, տվյալ ժամանակահատվածում նույնքան (4,25 տ.կ.-ով) նվազել են լոմբարդային ռեպոների և բանկերից ներգրավված ավանդների տոկոսադրույքները՝ 2022թ. դեկտեմբերին արձանագրված (և մինչև 2023թ. հունիս պահպանվող) առավելագույն, համապատասխանաբար, 12,25% և 9,25% - ից ։ Բայց  վերաֆինանսավորման տոկոսադրույքի, լոմբարդային ռեպոների և բանկերից ներգրավված ավանդների տոկոսադրույքների ներկայիս մակարդակներն առայժմ հեռու են 2020 թվականի երկրորդ կեսին արձանագրված նվազագույն նշաձողերից, համապատասխանաբար՝ 4,25%, 5,75% և 2,75%:

Ըստ վիճակագրական տվյալների՝ 2025թ. դեկտեմբերին 2024թ. դեկտեմբերի համեմատ արձանագրվել է 3.3% գնաճ ՝ 2024թ. դեկտեմբերին 2023թ. դեկտեմբերի համեմատ արձանագրված 1.5% գնաճային ցուցանիշի դիմաց: Կենտրոնական բանկի կողմից հաշվարկվող տարեկան դեկտեմբերյան գնաճի բազային ցուցանիշը կազմել է 4.3% ՝ նախորդ տարվա նույն ժամանակահատվածի 0.9% գնաճի դիմաց: Այսօր ժամը 14:00-ին տեղի ունեցած մամուլի ասուլիսի ժամանակ ԿԲ խորհրդի որոշման մանրամասն հիմնավորումը ներկայացրել է ԿԲ նախագահ Մարտին Գալստյանը: Ասուլիսը հեռարձակվել է նաև առցանց:

Հիշեցնենք, որ Հայաստանի Կենտրոնական բանկը 2,5 տարի (2020թ. դեկտեմբերից մինչև 2023թ. կեսերը) վերաֆինանսավորման տոկոսադրույքի նվազագույն 4,25% - ից մինչև առավելագույն 10,75% (այսինքն ՝ 6,5 տ. կ. - ով) բարձրացումից հետո  սկսել է իջեցնել առանցքային տոկոսադրույքը, սկսած 2023թ. հունիսի 13-ից, շարունակելով այդ քաղաքականությունը 2024 և 2025 թվականներին ։ Մասնավորապես, 2025թ. փետրվարին առանցքային տոկոսադրույքը 7% - ից իջեցվել է մինչև 6,75% ՝ պահպանելով այդ մակարդակը մինչև դեկտեմբերի կեսերը, երբ հաջորդել է տարվա ընթացքում երկրորդ նվազումը մինչև 6,5%:

Նշենք, որ 2025 թվականից սկսած գնաճի թիրախավորված նշաձողը սահմանվել է 3% ՝ + / - 1 տ.կ. թույլատրելի շեղումների միջակայքով (նախկին 4% - ի դիմաց, + / - 1,5 տ. կ.): "ՀՀ 2025թ. պետական բյուջեի մասին" ՀՀ օրենքում նախատեսվում է, որ Կենտրոնական բանկը դրամավարկային քաղաքականության վերաբերյալ որոշումներ ընդունելիս այսուհետ առաջնորդվելու է գնաճի այս թիրախային նշաձողով: Գնաճի թիրախավորված շեմի նվազեցումը երկարաժամկետ կայուն տնտեսական աճի հեռանկարների և հասարակության բարեկեցության բարձրացման ուղղությամբ ԿԲ-ի և ՀՀ կառավարության համատեղ մոտեցման իրականացման կարևոր նախադրյալ է: